PINSANNU LA SICILIA, di Carmelo D' Accardo

·        Matri sicilia mia, terra ‘nfatata

allucintata di l’eterni stiddi

di un suli senza pari illuminata

·        quannu ti penzu ‘ntra li mei pupiddi

viu n’arcanu, chinu di trisoru

ca brilla ‘ntra stu pettu e fa faiddi

·        sempri pinzannu a tia ni spinnu e moru

sempri pinzannu a tia, penzu a me stissu

quannu era ccu tia, locu me d’oru

·        comu prima ti cercu e t’amu spissu

comu tannu t’aduru, a la pazzia

di la pena riduttu un curgifissu

·        venimi ‘nzonnu armenu o Matri mia

quantu vidissi ancora li iardina

carricati d’aranci e di lumia

·        e un và ca vegnu, ‘ntra la siritina

di genti, ca turnassiru a la casa

ccu panara di persichi e racina

·        vurria vidiri ancora a prima basa

li muli in trippu, dintra l’aria tunna

china di gregni, e la spiranza rasa

·        quannu lu granu, arriva ca si munna

e luci cchiù di l’oru e di l’argentu

canta massaru, ca la pala spunna

·        sti’immagini ca penzu e mi rammentu

cchiù di l’autri cosi sarvu e scrivu

cchiù d’amuri m’avanza , e mi turmentu

·        penzu tradenti, la pala e lu crivu

sacchi, visazzi, vardeddi e rutuna

foru li stigli ca cci cummattivu

·        ‘ntamentri in cumpagnia di stiddi e luna

supra la paglia, doppu ca spagliata

tavula fici, a li me maccarruna

·        cchi vita bedda! Larga e spinzirata

puru osservannu tutta la natura

di varia forma, ricca appitturata

·        gintuzzi cantiannu a la vintura

puru ppi guadagnarisi lu pani

lu cori ‘mpintu e un saccu a la cintura

·        e n’abbaiu cuntinuu di cani

ca tenu ppi sò guardia li pasturi

contra li gurpi, e la genti fruntani

·        quali prudigiu, e di gran geniu puri

di siciliani, d’amuri e curaggiu

crisceru a la Sicilia lu valuri

·        purtannuci ppi stemma un gran vantaggiu

di arvulu e primari vigniti

e lu vinu ca canta ogni vuttaggiu

cui si lu vivi  e un senti cchiù la siti.