La Sicilia Conca d' Oro e " Pregi di Sicilia " di Carmelo D' Accardo

LA ME SICILIA. CONCA D’ORU

‘Nzacciu pirchì si chiama Conca d’oru

stà terra senza umbra di furtuna

e ricca di fragranza e di ristoru

ma la fami s’acchiappa a timpuluna

ma nuddu dicu, nuddu, nuddu foru

ccussì amurusi, ‘mpiegati e patruna

di sta Sicilia Matri, figlia e soru

livarila a li manu, a stì latruna

oru? Ma unni è l’oru? Ca duvissi

stari a la testa di tutti li matri

Pilatu un sacciu, quali sorti scrissi

sulu ca quattru ccu li panzi satri

mancianu a spaddi di li curgifissi

l’onestu emigra e restanu li latri.

E propia ppi stu duvutu motivu la sicilia campa sempri afflitta e puviredda, ppi tutti sti sgruccuna a la quali ni lu so cori nun po’ aviri paci né ora né mai.

Povera sicilia mia.

Autore   D' Accardo  Carmelo

PREGI DI SICILIA

Vaddi funnuti, ciumari e muntagna

e ppi favi e linticchi, e ppi furmentu

senza l’aguali, comu oru e argentu

l’avi ‘mpinciuti, ‘ntra li sò carcagni

di ficu, pira, puma e di castagni

nuci e nuciddi, senza finimentu

e l’ulivara, si cci stanu attentu

fanu di stemma a tutti li campagni

di pregi e antichità n’avi a un finiri

‘ntutti li parti, ‘nzina a Siracusa

ca cci vanu turista ppi vidiri

cc’è Taurmina la primaria spusa

di l’aria ca a nuddu fa muriri

nidu di ‘nglisi, ‘ncanta e sta pumpusa.

autore   D'Accardo  Carmelo