la muglieri di D' Accardo Carmelo

    Muglieri

1

·        Sbriu di l’omu, la muglieri è rosa

Ca ‘ntra lu latu sò, sempri sta misa

È comu na palumma, vola e posa

‘ntra li vrazza di l’omu, e nenti pisa

·        e si l’accorda, supra d’ogni cosa

ccu la ducizza, e la vuccuzza a risa

e si pettu ccu pettu cci arriposa

sbampa lu focu, e l’omu ‘mparadisa

2

·        la spusa, è la ricchizza di la casa

ca duna a l’omu, la sò pulizia

sumiglia a n’arvuliddu di cirasa

ca fa la pampinedda purmintia

·        e la sò cruci, si l’abbrazza e vasa

senza rancuri e né malincunia

fu fatta apposta, di l’eterna basa

ppi godiri ccu l’omu, in cumpagnia

3

·        unni donna nun cc’è, cci su suspiri

unni donna nun c’è, c’è sempri chiantu

ppi quantu n’aiu vistu, a me pariri

è tutta virità, nzoccu vi cantu

·        la donna nun mà datu, mai cchi diri

e me muglieri è sempri lu me vantu

guida ppi l’omu – la donna è piaciri

c’ogni capiddu sò, ppi l’omu è mantu