AMURI A LA DONNA

• Nun cc’è cosa a lu munnu cchiù sincera
Comu la donna ppi l’omu criata
Spassu e triunfu stidda, luna e spera
Diu la fici tantu interessata

• sta cumpagnedda con si po’ scurdari
ca ccu l’amuri sò, campa biata
iu quannu sentu na donna parlari
sentu a lu cori na vampa d’amuri

• comu a la prima età senza sbagliari
ca si ppi casu, iu fussi un pitturi
e pussidissi na gran massa d’oru
d’oru cci lu pittassi lu culuri

• comu difatti iu ppi d’idda moru
la viu anchi in sonnu in fantasia
comu vidissi un munnu di trisoru
d’idda ccu tantu affettu e gintilia

                                                                                 continua 



• m’ha datu na terribili scienza
ca iu na vota chistu un lu sapia
ca ccu l’amuri di la sò coscienza
ma ‘mparatu a canusciri la casa

• ccu lu ‘ntellettu e ccu la paci immenza
ogni discursu ed ogni duci frasa
ca nnesci ‘ntra la donna di la vucca
di tutti li virtù sempri sta rasa

• ppi chissu l’amu e la taliu mmucca
comu na stidda quannu l’arba spacca
ca ccu lu meli sò sempri abbucca
ccu la catina sò sempri m’attacca.