INCONTRO CON I POETI di D'Accardo

–      INCONTRO CON I POETI

(IN 4 CANTI,  TERZINE)

primo   canto :

·        ‘Ntra  lu  castellu  di  lu  gran  Parnasu

sonanu  li  campani  ccu  allammicu

con  sacciu  comu  fu  tuttu  stu  casu

·        n’amicu  miu  dumanna  a  n‘autru  amicu

di  comu  fù  sta  morti  subitania

di  mia  viventi  a  menzu  a  tantu  ‘ntricu

·        Danti  sciuntinu  ccu  na  forti  smània

comu  senti  lu  fattu  si  nni  doli

ed  a  Petrarca  cci  fumau  la  crania

·        dissi Ariostu quannu Diu nni voli

‘mrazza nni piglia e nni porta ccu d’idda

e midicina un c’è ca cura e coli

·        Torquatu Tassu misu a n’agnuniddu

‘nvita a li maistri di la cima

di visitari a mia, lu picciliddu

·        ddocu Giuseppi Giusti cangia rima

e va chiamannu a tutti li Pueti

ppi stu granni curdogliu e tanta stima

·         

·        Vittorio Arfieri ‘ntra sti granni ceti

tuttu cummossu di la pena amara

veni ‘nsilenziu senza ca ripeti

·        Giuvanni Meli priparau la vara

mentri Parini di lu sò iardinu

centu ghirlandi inzemula pripara

·        Ninu Martogliu comu vati finu

fà un telegramma a lu so amicu Oraziu

e trasmettirlu ad Omeru in latinu

·        Dafini puru ‘mmenzu a tantu strazziu

ccu Teocritu portanu u luttu

e Pintaru cci fa tantu ringraziu

·        Ciullo ca a sta dulenza fu ‘ntraduttu

ca cci lu scrissi Jabbicu Leopardi

parsi ca persi ‘ntra lu munnu tuttu

·        ora veni comu dui stinnardi

Pippinu Villaroel ccu Carducci

a li me spogli a farimi riguardi

·        portanu carta, calamara e stucci

ppi scriviri nun sacciu quarchi cosa

a mia puetu e lupu di ristucci

·        unu scriveva in versi e unu in prosa

ca iu potti capiri a un sulu versu

si persi l’armunia di Villarosa

·         

·        iu mi votu ccu d’iddi e l’occhi sbersi

e cci dicu cchi cc’entra amicu bonu

ca siddu mancu iu è tuttu persu?

·        ora sti tempi quantu va lu sonu

lu cinima, li pupi e li cantanti

unni cc’è chista puisia un nni vonu

·        ‘ntra stu frattempu s’apprisenta Danti

e m’approva lu discursu miu

ca brutti provi n’appi tanti e tanti

·        penza mi dissi quannu c’era iu

‘ntra stu munnu di farsi e di faccioli

chiddu ca vitti primu ca muriu

·        ca n’appi tanti trivuli e scunzoli

senza rispettu ‘ntra lu duru esiliu

ca a diritillu lu cori mi doli

·        difatti accumpagnatu di Virgiliu

dintra lu ‘nfernu comu tu lu sai

quantu farsi vitti a domiciliu

·        vitti chiddu ca nuddu vitti mai

‘mmenzu lu focu lu ielu e lu ventu

munnu chiamatu senza luci e rai

·        doppu passatu tuttu stu turmentu

e li me carni crita addivintaru

giuva la morti e nasci un pintimentu

·        ca li stessi ca a morti mi gridaru

si ‘nchinucchiaru avanti a li me spogli

comu li licchi avanti a lu laparu

·        gira lu munnu e trovi in tanti sogli

senza l’effiggi di la sapienza

ca la morti scancella a ccu l’accogli

·        ca siddu in vita un’appi st’aderenza

e mortu stessu sugnu sempri vivu

ogni  iornu  la  vita  m’accumenza

·        tu stacci attentu a chiddu ca ti scrivu

e ‘ntra la menti tenila ppi norma

puntu ppi puntu e supra ogni motivu

·        sai ca la scienza e comu forma

di geniu, suggettu a tanta critica

ca la svaluta e strania ‘nforma

·        ed assecunnu chiddu ca l’allitica

siddu si trova in tavula livatu

sciogli la lingua e cci diventa stitica