LA CACCIA
RUBRICA CARMELO
D’ACCARDO
( a cura
di Fedele Di
Francisca)
Questa settimana,
presento una divertente
scena di caccia.
“U Villarusanu iè
famosu ppi dui
cosi, quannu va
a mari, ca
torna tuttu cuttu
do suli ( scottatura di
terzo grado) “,
e ppi quannu
si nni va
a CACCIA. BUON
DIVERTIMENTO.
LA POESIA
“A CACCIA” LA
TROVI SU facebok
pag. Villarosani nel mondo,
pag. Le Poesie di Fedele, blog www.lepoesiedifedele.blogspot.it
1
Sutta l’oscurità, supra disposta
discurremu ppi strata, a scinni e acchiana
senza pinzari, senza fari sosta
luncavamu lu passu, a tutta gana.
Macalusu ripiglia na proposta
cridennu ca nun fussi tanta strana
e dissi – fermi ccà, stamu a la posta
ca ‘ntra stu puntu, sacciu na gran tana
2
Mastrusimuni ccu palori boni
rispusi, amici mei, a meraviglia
nun ni circamu – ccu sta opinioni
iri a la posta, a lebri ed a cuniglia
e mancu a statu nostra passioni
fari la caccia o rumpiri la briglia
anzi vi pregu, un facimu ciantoni
pirchì di notti, cc’è chiddu ca viglia
3
Macalusa cumenza a fari stolu
si nun pigliu un cunigliu appressu un vegnu
puru ca mi sbattiti ‘nterra a solu
di cca un mi smovu, fermu mi trattegnu
spirannu di ‘nzirtari lu violu
fari sta caccia, ccu primariu ‘ncegnu
anzi si mi purtava lu riolu
era megliu ppi nui, datu l’impegnu
4
già Macalusu seguita la caccia
e sutta un limmitazzu si v’ammuccia
lu cuniglieddu ccu lu coddu e affaccia
sfrattiniava un filu di ristuccia
ed iu, pocu luntanu di la traccia
stava guardignu, sutta la scappuccia
viu ca scappa e cu si scaccia scaccia
e sparu na petra, ppi cartuccia
5
l’acchiappu appena e lu cunigliu scappa
iennu currennu ccu na gamma zoppa
e ni tuccau fari na gran tappa
currennu appressu a d’iddu, a dialoppa
cc’era un pirtusu anticu ‘ntra na cciappa
tuttu ammarratu di fila e di sgroppa
eccu, ca lu cunigliu, lu va stoppa
si ‘nfila ann’intra e si scanza la ‘ntoppa
6
cuminzammu a livari petri e sterru
circavamu a spianari la cunzarra
ma ccu li manu suli, senza un ferru
tutta la forza, ni vineva barra
dispirati, a cca lu pigliu e cca l’afferru
ma la ‘mprisa si vitti, ch’era sgarra
e ni assittammu stanchi, supra un cerru
tinennuni li rini e ccu la garra
7
veni Mastrusimuni, all’impruvvisa
e veni a trova, tuttu ddu travagliu
ccussì mi dissi – o sciocchi e senza ‘ntisa
e vi lu dicu, senza ca m’accagliu
‘ntucca la rocca mittiri la ‘mprisa
cridennu puru di fari virsagliu
e doppu fari un munti di maisa
già vi finiu, comu lu scravagliu
8
Macalusu s’arrabbia e rispunni
E cci assicura, tuccammu li pila
Mastrusimuni rispunniu – ma unni
Ma cchi – ma quali! Ancora mi la fila?
Macalusu ripiglia, un si cunfunni
Si sta cuntenti, senza ca si pila
ca iorna cci nn’è tanti, senza funni
però si avi prescia, parti e sfila
9
ma si partemmu tutti in cumpagnia
pirchì, sulu a iè partiri davanti
e si mi ammatti un mali ppi la via
vuantri tutti dui siti garanti
comu pur’anchi – si ammatti a vossia
iu sugnu rispunzabili e mancanti
iamu vi pregu, d’ascutari a mia
prima ca vi succedi l’accasanti
10
Macalusu rispunni, fermi, muti
eccu ca sentu, n’antra rumurata
lu cunigliu si cridi, su partuti
e cerca di sgriddari, a la spinzata
ma nui, si stamu ccà cincu minuti
si sgridda, cci la tramu na pitrata
eccu – ca tutti tri, ccu grossi cuti
puntavamu dda tana, scafurchiata
11
poi succedi , na putenti lotta
‘nfacci a la tana, ca paria na grutta
lu cunigliu scappau, tuttu a na botta
passannu in menzu, di nuantri ‘nzutta
eccu di ccà, eccu di ddà, dintra na zotta
facennu tutti tri, duna ed ammutta
e ‘menzu la
baruffa, di cunflotta
cademmu tutti tri, cu supra sutta
12
ora succeddi, un pocu di scumpigliu
tra lu miu amicu, e l’antru amicu saggiu
però ppi l’onestati e lu puntigliu
seguitammu e ni misimu in viaggiu
iu puru struppiatu, afflittu figliu
persi lu stili, di lu me linguaggiu
dissi Mastrusimuni – oh! Ppi un cunigliu
cadiri ‘nterra tri, cci vò curaggiu.
Nessun commento:
Posta un commento