DUPPU TRENTANNI di D'ACCARDO

RUBRICA   CARMELO   D’ACCARDO

(a   cura   di  Fedele   Di  Francisca)

Al   Poeta    D’accardo   è    accaduto   quello   che  oggi    sta  succedendo  a   molte   famiglie  italiane :    scivolare   nella   miseria   e   vivere   in    povertà.

Questa   poesia   esprime   lo    stato  d’animo    di  chi   si   trova,  senza   volerlo,in  questa   condizione,  dopo  avere  condotto   una   vita      dignitosa  di  lavoro  .

DOPPU     TRENT’ANNI

1

Doppu trent’anni, tuttu mi crideva

nun mi crideva, arrivari a stu puntu

scauzu e nudu, comu Adamu ed Eva

2

ca anchi a stissi scrivirlu m’affruntu

di scacciari accussì, la mè pirsuna

ca paru unu, ca a stu munnu un cunta

3

ma si vosi accussì la mè sfurtuna

la è diri ppi forza, o vogliu o un vogliu

o parlu, o un parlu, cc’è cu sinnadduna

4

quannu manca lu pani e lu cummogliu

ogni omu di munnu guarda e osserva

guarda fanzinu e spalisa lu ‘mrogliu

5

di chisti cci nnè assai genti mal’erva

ca sparlanu lu miseru ch’è nudu

ed iddi hannu quarchi figlia a serva

6

basta, chisti fantasimi l’escludu

ca si cci penzu, mi veni la rabbia

e cchiù cci penzu e cchiù tuttu mi rudu

7

lu munnu e gira e vota e pari gabbia

la furtuna di l’omu è niquilibria

e cadi peggiu di na scarsa tabbia

8

ma si s’attacca ccu na grossa fibria

cc’è la spiranza, ca dda sorti dura

quantu n’oliva, o quantu na calibria

9

di reda e reda, quannu la sbintura

crisci l’eredi, di li sbinturati

si li porta accussì, a la sipurtura

10

iu cci ‘ncappai, e vaiu strati strati

comu a l’afflitti, a campari muddichi

senza ca nuddu , m’avi la pietati

11

e quannu viu soffriri li nichi

penzu e suspiru, l’amuri di mia

dicennu, unni sù, ddi tempi antichi

12

aimè!  O cchi vita! O cchi dulia

cchi vita, ca di nuddu avi spranza

ma acchiù tostu, disturbi e pucantria

13

Diu si di sti guai mi nni scanza

nun penzu, né passatu e né avviniri

sulu penzu ppi ccu? Ppi la me panza

14

e ppi sta vucca ca ietta suspiri

mi la chiudu ppi sempri e nun la grapu

‘nzina lu iornu, di lu me muriri

15

ma si la sorti accumenza dacapu

a darimi turmenti, abbili e peni

mi cummeni affucarimi ccun capu

16

oh ! sorti! O sorti, comu cchiù nun veni

sbintura ti ‘nfilasti a la me casa

e sdisulasti li me antichi beni

17

prima, sutta d’un pedi di cirasa

tempu d’estati, assittati a lu friscu

ccu l’amici cuntava quarchi frasa

18

doppu ccun ciascu e pani e caciu friscu

manciavanu cuntenti e senza dica

cantavanu cunformi a un chiaru discu

19

ma ora, cun cc’è cchiù l’ebbica antica

passaru tutti li divertimenti

lu spassu si canciau ccu chiantu e ardica

20

lu stissu amuri, ca rignava ardenti

ora ca nun c’è cchiù, chiddu ca cc’era

ama sdignusa e poi mustra li denti

21

anchi li figli, cangianu di cera

c’ognunu d’iddi li sò sguarda attrista

ca aviri un pannu cchiù, ppi quantu spera

22

chiancinu tutti e cui s’abbatti e pista

tirannusi li capiddi di la testa

dicennu, patri miu, cchi vita è chista?

23

iu cci rispunnu, è vita onesta

vita ca si durassi, accussì sempri

la morti, un ni putissi dari mesta

24

si strascinassi ppi ‘nzina li membri

e nun ristassi cchiù arma criata

ppi fari festa, a lu dui novempri

25

cci fussi un cimiteru ogni casata

tutti li morti ‘nterra e senza cruci

ittati di cca e dda, strata ppi strata

26

anchi di ‘ncelu, chidda eterna luci

nun s’affacciassi cchiù, comu s’affaccia

ca suffrigissi, di li carni atruci

27

però ‘ncampagna abbunnassi la caccia

pirchì lu cacciaturi doppu mortu

nun circassi né tana e mancu traccia

28

forsi ogni discursu accussì tortu

nun succidissi mai, supra di nui

spirannu lu megliu e damuni cunfortu

29

Cristu di ‘ncelu, pinzaticci vui

ppi matri e patri e soru e frati e figli

ca sciuntinazzi sunu a l’allelui

30

iu penzu e dicu , comu, tanti gigli

ppi nun aviri la giusta curtiva

sunu a li grampi di li cuncutrigli?

31

nuddu li penza cchiù, nuddu li civa

nuddu cci duna cchiù, chiddu ristoru

ma cchiù tostu di cchiù li frena e priva.