Le Poesie di Fedele: gennaio 2014

mercoledì 29 gennaio 2014

PPO DUTTURI CA MI CURA

PPO DUTTURI CA MI CURA

Aiu scrittu ppi tanti genti

capi sala, amici e parenti

iu pinsu e dicu: “ e allura “ ???

nun puzzu scriviri PPO Dutturi ca mi cura ?

Mi permettu di accuminciari di accussì,

cumpagni di complessu finu o 1973 :

dui di nomi Francu, iu e …… u “ Bollo “

e ddu cumplessu pariva nu Franco – Bollo

ma iera sulamenti ‘na bolla !

iu, ca iera u cchiù ranni in pista

mi misi a fari lu elettricista

ccu l’ autri ni pirsimu di vista……

ma do Dutturi fuiu misu ‘nti la lista

quannu mi dissi lu mali ca iu aviva

di trimarici la manu nun finiva

pinsaiu, ma vidi cchi razza di còsi

a lu me dutturi tremanu tuttu còsi

Chistu pirchì diddu sapiva

ma a a mì, nenti mi diciva.

Ma chi puzzu fari I’ ?

‘na vincita tutta ppi TI’

Lu Dutturi Francu mi controlla continuamenti

mi duna tanti ‘ncoraggiamenti

mi sostieni pscologicamenti

curannumi lu corpu e la menti

nun mi puzzu scurdari

ca ppi farimi urinari

‘na medicina mi i ‘ a dari….

contru lu pareri….

di cinqu luminari

mi manna di città in città

ppi fari lu DAT- e SCA’N

ppi li staminali

nun na ma parlari

ca ppi curpa di un Cardinali…

a ricerca si nni ì a mari

ma ccu li curi attuali

a malatì va avanti a gradi a gradi

a la vucula ca pigliatu

facili ca veni l’ urtimu jatu

accussì nun ci sarò cchiù

e nun ni parlamu cchiù.

Ti ringraziu ppi tuttu chiddu

ca ai fattu ppi mì

Auguru bona vita

a to famiglia e a Tì.

Ah, mi lu stava scurdannu:

‘Na vota mi sunà u telefoninu

e cu iera ? lu me dutturi, cunfunnutu !

Dintra aviva iutu

tuttu o scuru aviva truvatu

ccu lu interventu di un minutu….

lu lustru iè arrivatu

Lu Dutturi, di cunfunnutu, addivintò meravigliatu:

“Ma cumu a fattu chistu ccà

‘nti un minutu, tuttu cosi aggiustà ?

Ehi, caru Dutturi,

cumu fa TU, a farimi passari lu malessiri :

- o cco rimediu di la nonna, cca so scaltrizza

- o ccu dda schifezza accattata ‘nto farmacista

- o ccu lu aiutu do Signiruzzu

ca lu a iè pregari cchiù ca puzzu

Villarosa dicembre 2012

giovedì 23 gennaio 2014

"LA FINI DI LU PATRI" di Carmelo D'accardo

“Chista iè a fini di un poviru Patri, duppu aviri ittatu

un saccu di sangu, ppi li proprii figli “

LA FINI DI LU PATRI

Comu finisci doppu tantu stentu

ppi n’omu ca travaglia a l’acqua e ventu

stintannu na famiglia, a granni e nichi

ccu tanta furniscia, ccu tanti dichi

stancu ed amaru, di matina e sira

sempri sudatu, e chinu di suspira

mentri li figli nichi un lu capiscinu

li guai, a lu patruzzu ca cci criscinu

ca mentri ogn’unu d’iddi, ioca e sciala

lu patri arrunchia guai, ccu la pala

spirannu, ca sti figli nicareddi

sarannu abbentu, di li soi marteddi

spera, spirannu, si li mitti ‘mbrazza

senza pinzari, siddu si strapazza

cci accatta carameli e quarchi conu

ca lu nicu cci dici patri bonu

poi l’accarizza, e tuttu duci duci

lassari nun lu vò porta la cruci

di ccà, di ddà, cci offri ogni minutu

e viva! Dunca lu patri trunzutu

figli di l’arma sò, figli di l’arma

‘nzina ca nichi nuddu cci li ciarma

su tutti sò, si mancia a coru e a chiurma

allegramenti, e tutti di na furma

passanu l’anni, e lu primariu sessu

cci cumenza a viniri lu ‘nteressu

nò ppi lu patri ca ha suffrutu tantu

ma ppi ‘nteressi sò, lu patri ha chiantu

pinzannu a l’autri figli, nudi e scauzi

ca chiddu granni s’attaccau li cauzi

cerca? E ccu cerca? Si vò fari zitu

mentri lu patri quasi rimbambitu

stupisci, a tali strania richiesta

ca cci vulissi dari un pugnu ‘ntesta

truvannulu di menti, tutti pari

sulu si parla, di lu maritari

nun si penza a la casa e a tanti spisi

chi occurrunu ppi scarpi e ppi cammisi

di pani, cubannaggiu, pasta e carni

ppi sullivari a tutti, ca su giarni

anzi ppi cu lu primu si la sgrigna

tenta a la casa, fari la vinnigna

lassannu sulu, l’antu di la porta

lu patri ‘mpisu, ognunu ca trasporta

casa furmata di iennari e nori

di figli, di niputi e nenticori

lu patri persi, la spiranza tutta

ca di ciantoni e chiarchiari s’abbutta

ccussì finisci a l’urtimu a lu patri

chi avissi a stari, ccu li cianchi satri

‘ntornu a li figli, ca purtava ‘mbrazza

ccussì cci finì, a Principi sbarazza

nuddu lu penza, abbannunatu in tuttu

cu cci lu renni, lu virsatu fruttu?

‘ntra n’anculu di casa, spiddizzatu

nuddu lu cerca, puru ch’è malatu

po’ gridari di cchiù, fari un comizziu

vittima è sempri, di lu sacrifizziu.

QUESTA E’ LA FINE DI UN POVERO PADRE DOPO AVERE SPARSO TANTO SANGUE VERSO I PROPRI FIGLI.
Carmelo D'Accardo

sabato 18 gennaio 2014

"LU CENTRU IGIEA" S. Cataldo (CL) Centru di analisi d' eccillenza

Rubrica Costume e società di Fedele Di Francisca Mi sembra doveroso dare lustro a una struttura, che si è distinta, per gentilezza, efficienza, velocità, e precisione. E’ il Massimo.

Da circa dieci anni che vado a San Cataldo(CL) per ragioni di salute, mi è arrivata spontanea l’ ispirazione per la seguente poesia:

LU CENTRU IGIEA
( Centro di Analisi di eccillenza)

Trasiu ‘nti lu centru, ppi putiri sapiri cchi aiu

tanti pirsuni, puru di lu paisi miu, truvaiu

lestu, si ittà, di ccà e di ddà, la vuci

iè giustu, ca la bona furtuna,..... Vi luci

iè ‘nu centru cunvalidatu, direttu di lu Dr. Raimunnu

ca a stessa gintilizza, mancu si ti giri lu munnu

trasinnu, unni fanu lu prelievu, dilicatezza attruvi

e ti mittinu a to agiu, ccu la finizza, a tutti l’ uri

ti fanu assittari ‘nti ‘na seggia

pochi secunni, cca manu leggia

finiru…....ca mancu ti ‘nnadduni

ti surridunu ........ e ti ‘nnadduni

già lu malatu si senti cunfurtatu

si ccu lu surrisu e curtisia veni trattatu

tutti li ‘mpiegati, fanu lu travagliu ccu garbu

di li strutturi pubblici, a genti, si nni sta a lu largu

ppi essiri, lu Dutturi Raimondi, a la Dirigenza

ie’ da darici omaggiu a la so’ ‘ntiligenza

di dui Dutturesse, Katy e Antonella, iè circondatu

dui Dutturi, Massimu e Filippu, Lu Signuri a mannatu

iu pinsu ca di lu Dirigenti, finu all’urtimu agghicatu

sunu tutti cumpitenti ppi fari l’accuglienza

chissu voli diri ca, di sicuru, anu truvatu l’essenza

e l’essenza si truva, quannu si iavi a cumpitenza

e putinnu diri, ca tutti travaglianu ccu cuscenza…

sunu tutti miritevuli, di aviri rivirenza

e grazii di la vustra prisenza

cumplimenti e agurii

ccu rispettu e stima

21/11/2012 Fedele Di Francisca

martedì 14 gennaio 2014

SUMMA ITALIA MIA

RUBRICA Carmelo D’accardo

(a cura di Fedele Di Francisca)

Noi, che siamo nati dopo il 1945, possiamo soltanto immaginare le condizioni della Italia, dopo una disatrosa guerra.

SI, abbiamo visto i filmati, ma viverla in prima persona è un’ altra cosa.

Questo è successo al Poeta D’Accardo, che ha dedicato nel 1946 a “Summa Italia mia” , come la chiama Lui, la Poesia dal titolo “ SUMMA ITALIA MIA

Summa Italia mia, quannu ti guardu

‘ntra lu tò statu, comu si ridutta

‘mmenzu a li vampi, comu a tia mi ardu

già la timpesta, ti lassau distrutta

trannusi, ponti, casi e pidamenta

massima unni cchiù, la china sbutta

oh! Quali mia pietà, ca mi turmenta

ca ti vulissi vidiri na vota

ccu li chiaghi sanati, e cchiù cuntenta

comu a l’antica, ccu la trizza sciata

la spata in manu, comu a San Micheli

quannu ccu un corpu, a lu visperiu sbota

sacru ricordu miu, comu lu meli

ti speru, ti cuntemplu, ogni momentu

dicu Gesuzzu! Ascutami a li celi

leva a sta Matri, tuttu stu turmentu

ca strati strati, comu piccilidda

chianci ppi lu panuzzu, e ppi lamentu

ca si vosi accussì, la mala stidda

di perdiri li gammi e li so vrazza

senza pani, di tunnu un la spuntidda

siddu senza linzola e né chiumazza

dormi di mala cura, e sonnu picca

la brutta fami, l’anima cci strazza

si n’arvulu ben fattu, bonu spicca

riccu di rami e carricu di frunna

siddu un ci chiovi un frutta, ma strasicca

si meci, un bonu clima, acqua abunna

e l’arvuliddu, veni abriviratu…

carrica e utili duna a la rimunna

mmeci l’Italia nostra, senza ciatu

quali aiuti po’ dari a li sò figli

si lu iardinu sò è divastatu?

giru, caminu e guardu li sò gigli

piatusi, sicchi, sicchi e ‘mpatidduti

comu la carni, supra li gradigli

anchi li parmi viu ‘nziccanuti

simbulu eternu, di la nostra storia

ccu li ramuzzi sò, ‘nterra caduti

e ppi nun dari a nuddu vincitoria

chianciu nascostu, tra n’arcova o n’arcu

nun dannu tregua, nò, a la mia memoria

Italia mia! ‘ntra stu duru varcu

rusbigliati, un pinzari la tò scena

si la tò sorti, è mmanu di San Marcu

nun sempri, quannu c’è na dura pena

durari eterna, nun si scrivi mai

passa lu tempu, campia ed assirena

di li figliuzzi toi morti ca hai

sempri su gloria tò, dirittu e stima

fruntu a lu munnu, ca ‘nginocchiu stai

si a l’arvuliddi tò, siccau la cima

e lu ziccuni virdi s’ammanteni

scatta di latu, e torna cumu prima

quannu natura, ruppi li sò freni

ed agitata, sdirrupau Missina

nuddu ci critti cchiù, ca munnu cceni

cc’era lu sancu, ca scurria a lavina

mmenzu di petri e sterru, e massi e focu

senza nuddu riparu, a dda ruvina

intantu, ccu lu tempu, a pocu a pocu

ppi vuliri di Cristu e ccu la sorti

sorgi Missina, ‘ntra lu stessu locu

ora Missina avi tettu e porti

a Missina si parla missinisi

e missinisi su, ‘nzina li morti

ccussì tu Matri Italia, ‘ntra stì ‘mprisi

di guerra, strapazzata comu linu

guerra e disastru, ca ‘ncruci ti misi

e nui d’appressu di lu tò distinu

comu furmichi, quannu a la so tana

si aiutanu a vicenna, e di cuntinu

cu scippa sterru e cui lu sterru acchiana

cu lentamenti, porta la muddica

ma di la tana sò, nun s’alluntana

ca si alivoti, un malu tempu aghica

e di acqua o di ventu o di furtura

dormi tranquilla in paci e un penza a dica

quannu na matri, ‘ntra li so dimura

avi li figli onesti e obidienti

surpassanu qualunchi sia sbintura

li ricchizzi a lu munnu, un sunu nenti

ma quantu va la paci e la cuncordia

mancu na massaria ccu li sò armenti

ca d’alivoti, ‘ntra na miniscordia

quannu l’ira di l’omu è ‘nferocita

o perdi o vinci, grida misericordia

dunca si nui, unn’avemu munita

basta ca simu sempri italiani

ccu lu tempu s’aggiusta la partita

disidiramu a Diu, tecchia di pani

ca nun mancassi, ‘ntra la nostra casa

‘ntra lu nostru casciuni, ogni dumani

ca ‘ntra lu munnu, la cchiù duci frasa

e chidda di lu pani e poi li spogli

veni d’appressu, a la secunna basa

senza pani, cc’è sciarri ccu li mogli

e ccu li figli, trivulu e baccanu

quannu lu patri dintra s’arricogli

oh! Diu, ppi tua pietà, mentri st’arcanu

iu a la Matri Italia discrivu

stenni di ‘ncelu, la tò santa manu

e a tò pariri, ca cui di pani è privu

binidicilu e dunacci ristoru

ccu lu tò sazianti duci civu

miu Diu signuri pietà! Prima ca moru

duna a sta matri Italia paci e amuri

ca martiri di pena canta a coru

l’innu di carità, chiaghi e duluri.

La presente lirica da me descritta nel 1946, volle dimostrare il dolore della mia Madre Italia, dopo la sua sconfitta.

sabato 11 gennaio 2014

PPI LU PAPA' DI ELISA DI FRANCISCA, medaglia d'oro alle olimpiadi per la scherma

RUBRICA COSTUME E SOCIETA’

A BALLANDO CON LE STELLE,

ha vinto la Campionessa mondiale ELISA DI FRANCISCA, medaglia d’ORO, alle olimpiade di LONDRA, su la scherma.

Lu papà di la campionessa Elisa Di Francisca

iavi un carattiri ammisca ammisca

la sira do 31 dicembre, l’ urtimu di l’ annu

stasira sugnu dducu ca a ma iri festeggiannu

D’accusì a mezzanotti brintammu

e ccu la campionessa ni telefonammu

ma la puisia iu già l’aviva scritta, a iosa

e lu titolo iè: “AVIVA A VENIRI A VILLAROSA”.

PPI LU PAPA' DI ELISA DI FRANCISCA

(Aviva a veniri a Villarosa)

Mi telefona 15 jorna prima, e mi dici

“jurnu 15 sugnu dducu, ccu tutta la bici”

ma quannu lu sintì la campionessa

lestu, lestu, addivintò ‘na leonessa !

ma papà, cumu ti pigli impegni ppi mì

senza avvertiri, ppi prima cosa, a mì ?

lu papà, ppi Villarosa iavi desideriu forti

allura progetta, ppi grapiri tutti li porti

lu aviva ereditatu di lu so patri, l’amuri ppi Villarosa

guai si…contru Villarosa, si diciva qualchi cosa

Vinni ppi abitari a Villarosa, supra ogni cosa

a li figli, fici canusciri lu paisi ppi prima cosa

accattò ‘n’ appartamentu, arredatu, chinu, chinu

cci aviva muntatu perfinu lu caminu

a zia Tina, ca iera ‘na pirsuna bianca e fina

‘na vota mi dissi, viniti a cena, tu e la sposina

ancora mi la ricurdu, la bedda sirata

mancu si avissi passatu, ‘na sula jurnata

‘na vota, di sira, d’ intra, unni unu si arrifrisca

s’ arricampà, e cu putiva essiri, Giuseppi Difrancisca

iè accussì, chissu iè lu so modu di essiri

iè estroversu, e assai amicizii arrinnesci a tessiri

quannu si iè ‘nsimi, unu veloci sa da lestiri

vi dicu cchi cumminà, mentri ca iu mi iva a vestiri

Maria Rosa iera curcata, ‘nti lu divanu

iu nun sapiva, unni mittiri li manu

Giuseppi, si misi lestu a li fornelli…

cucinannu, e mittinnusi a cantari li stornelli

e accussì, mangiammu, e n’ addivirtimmu tutti quanti

miritu di ‘stu papà, ca iè assai dinamicu, simpaticu e aitanti

Oggi iè lu papà di ‘na ranni campionessa mondiali

ma a da sottustari, ppi forza, a li ‘mpegni universali

m’a telefunatu Elisa, dicinnumi, ni vidimu a ottobri

spirannu ca la campionessa nun si truva a Nairobi

comunque, vugliu elogiari l’intera famiglia

ca iè formata da Martina

la mamma Ombretta

il Campione Michele

la campionessa Elisa

e ppi finìri "il grande Giuseppe, Giacomo

ca ppi la so terra natia

facissi ‘na pazzia

in omaggiu a lu so patri Michilinu

ca vinni a Villarosa di ricordi chinu

ca a la chiazza, stava ‘nsemi a so’ cuscinu.

Spirannu di ‘ncuntrari a campionessa di bon mattinu..

ma iu, sempri a la vuluntà di DIU, mi inchinu.

Ciao Giuseppe, sei grande

ccu affettu, lu to cuscinu

Fedele Di Francisca

Villarosa 2012

giovedì 9 gennaio 2014

n. 3 piccole poesie di Carmelo D'Accardo

RUBRICA Settimanale Carmelo D’accardo

(a cura di Fedele Di Francisca)

Questa Settimana, con le seguenti tre brevi poesie, scopriamo il pensiero e la opinione del poeta su:

1) LA RICCHIZZA

2) LU BENI

3) LU SOPRANOMI

Nun sacciu lu pirchì, è un gran brav’omu

‘ntantu lu sanu a sentiri lu crastu

oh! Signuri pietà! Chi bruttu nomu

cchi malu ‘ntricu e cchi malu cuntrastu

Le tre piccole poesie li trovi su “Villarosani nel mondo”,

“Le Poesie di Fedele” e blog

LA RICCHIZZA

La ricchizza si chiama gran turmentu

ca l’apporta la propia ricchizza

chidda cun voli, lu cumannamentu

ca spissi voti scapula e s’appizza

e quannu un riccu fa lu tistamentu

‘ntra la finali di la so alligrizza

mori puru dannannusi scuntentu

pirchì penza li beni ca cci appizza

megliu poviru ‘ncanna e senza nenti

ppi nun lassari a l’autri – la sciarra

comu succedi, a certi pussidenti

ma ppi cui lassa a l’autri na giarra

sugnu di certu, ca li soi parenti

mittinu manu, lestu a la chitarra.

LU BENI

Si dici ca lu beni è sempri beni

spissu però nun è riconusciutu

di certi genti, ca la testa un tenu

supra lu bustu, ca cci dessi aiutu

e sempri penzu a senzii sireni

ca cui duna di cori un cuntributu

la ricompenza sò, mai cci veni

mancu si scatta, dintra lu tabutu

lu veru beni, va rinnutu a mali

puru ca vi mittiti, aginucchiuni

a prigari ppi chiddu, senza sali

l’omu è diventatu un mulacciuni

ca cauci cafudda a tutti aguali

puru ni l’anca, di lu sò patruni.

LU SUPRANOMI

Nun sacciu lu pirchì, è un gran brav’omu

‘ntantu lu sanu a sentiri lu crastu

oh! Signuri pietà! Chi bruttu nomu

cchi malu ‘ntricu e cchi malu cuntrastu

iu mi dumannu, lu quali e lu comu

ca di corna un ci nn’è, mancu lu rastu

puru a l’aspettu, pari un galant’omu

ma la ‘nciuria è chidda, un cangia tastu

quantu curnuti, cci su peri peri

ccu lu cognomu onestu ed onuratu

e su crastazzi, di soru e muglieri

intantu, nun si cangia lu casatu

ma si avissuru ‘ntesta, corna veri

ogn’ unu d’iddi si stassi ‘ntanatu.