quannu a parti di zitaggiu
prisintati un beddu sonu
cc’è lu spassu e lu curaggiu
di cu senti e balla bonu
eccu ccà l’agenti in trippu
priparamu la quatriglia
la cumanna mastru Pippu
ccu na granni meraviglia
Bravu! Bravu! sunaturi
Dicci tutti ogni momentu
N’antru dici nonzignuri
Bravu tocca a lu strumentu
Ca fu fattu di na marca
La cchiù meglia di stu munnu
Quannu sona l’ecu sbarca
L’universu ‘ntunnu ‘ntunnu
Cc’è la radio macari
L’alligrizza di lu cori
Sona e canta e fa ascutari
Di lu munnu li palori
Senza iri a lu teatru
Tuttu già vi l’apprisenta
Ca macari resta satru
Lu me cori e s’accuntenta
Sentu un celibri tinuri
Ca mi ‘ncontra in fantasia
Chiaru parlu sull’amuri
Megliu un cc’è di st’armunia
Si l’avissi in miu pussessu
Chista radiu a la casa
Bannunassi ogni ‘nteressu
Di la vita e d’ogni frasa
Mi scurdassi li me peni
Li dulura e lu curdogliu
Di la morti quannu veni
Ppi attizzari lu ragogliu
Cc’è lu preggiu ca si sannu
Li discursi nton’ secunnu
Tutti chiddi ca si fannu
Di cca e dda a stu munnu munnu
Ccu lu sonu e lu risbigliu
Anchi l’omu ca travaglia
Cchiù si mitti di puntigliu
Ppi varcari a la battaglia
Quannu sona e diddu mancia
Pasta asciutta e cutuletti
Cchiù ci codda e cchiù s’arrancia
Ccu cucchiari e ccu bruccetti
Binidittu tu Marcuni
Ca facisti chistu ncegnu
Di purtari li canzuni
Ca si cantanu ogni regnu
Tu l’ascutu appassionatu
Comu quannu un picciutteddu
Ccu la zita sta assittatu
Ntra lu cori a lu marteddu
Parla ridi e l’accarizza
Ncelu tuttu s’innacchiana
Cchiù la guarda e cchiù ci appizza
Tempu e sordi e sfarda grana
Ma la radio è diversu
S’alliana e spenni picca
Si lu senti a tempu persu
Cchiù l’ascuta e cchiù s’allicca
Punta a Roma ed a Milanu
Mosca Londra e Novaiorca
Scuta e senti a manu a manu
Na manzurka o quarchi porca
Manca allura amici boni
Si vuliti stu strumentu
Lu diciti a Fratantoni
Ca v’accorda ogni momentu
Altri ancora si vuliti
Lu profumu cchiù avantatu
Ppi li schetti e ppi li ziti
Vi lu vinni a bon mircatu
Ccu na goccia sinni mitti
Ntra la facci o ntra la testa
D’unni passa a gammi dritti
Sempri oduri lassa e resta
Na picciotta ‘ncipriata
Pari sempri na riggina
Tutta bedda aggraziata
Di na stidda mattutina
Si macari è scarsulidda
Ncipriata cangia aspettu
Comu quannu a na iuridda
La pulisci chiddu addettu
Anche cipria è profumu
Va cent’unzi ppi na donna
Nun si chianci lu sfazzumu
Di cu a spenniri si sonna
Pirchì po’ quannu guardati
la zituzza tutta bedda
Li granuzza ca sfardati
Resta a l’occhiu a la venedda
Quannu l’omu o donna trasi
Ntra na stanza in un cummitu
Si su sporchi a Diu li nasi
Di cu affianca a ddu purchitu
Cu s’arrassa e cu s’attuppa
Vucca e nasu, nasu e vucca
Cu ppi fora nesci e stuppa
Ppun guardari cchiù a dda cucca
Quannu meci cc’è lu ciauru
Ca di ncoddu mparadisu
Nuddu resta mpiutu e mauru
Ntra na stanza mai divisa
Si l’accogli ogni pirsuna
Ccu fistini e bommulenza
Comu quannu la furtuna
Cerca l’omu in sua prisenza
Cc’è la crema c’abbillisci
La facciuzza a li pirsuni
Chiddi scarsi e chiddi lisci
Ccu li facci a guastidduni
Fratantoni n’avi tanta
Riservata ppi l’amici
Ca cu prova cci li avanta
Nzina a chiddu ca la fici
Spissu a l’omu o donna puru
Ccu sti tempi d’amarizza
Divintannu magru oscuru
Si cci appersu la biddizza
Ccu li tempuli sfumati
L’occhi quasi a vanidduzza
Vui viditi si guardati
Quarchi testa di cucuzza
Ccu sta granni invenzioni
Ca purtaru ccu la crema
Basta l’arma a Fratantoni
Di sbrugliarlu stu prublema.
Nessun commento:
Posta un commento